कलाल-कलार समाजाच्या उत्थानासाठी आर्थिक विकास महामंडळ स्थापन करा – जिल्हाधिकाऱ्यांमार्फत मुख्यमंत्र्यांना पाठवले निवेदन
यवतमाळ: देशाला स्वातंत्र्य मिळून 70 वर्षे उलटून गेली तरी कलाल-कलार समाजाचा एकही प्रतिनिधी नाही. हा समाज राज्यातील प्रत्येक जिल्ह्यात आणि आदिवासी व ग्रामीण भागात स्थायिक आहे. मात्र या समाजाकडे कोणत्याही सरकारने लक्ष दिले नाही. त्यामुळे हा समाज आर्थिक, सामाजिक आणि राजकीय क्षेत्रात मागासलेला आहे. समाजात सुशिक्षित बेरोजगारांची संख्याही वाढत आहे. अशा परिस्थितीत कलाल-कलार समाजाच्या उत्थानासाठी स्वतंत्र आर्थिक विकास महामंडळ निर्माण करावे, अशी मागणी समाजाने केली आहे. यासाठी कलाल-कलार समाजाच्या शिष्टमंडळाने आपल्या विविध मागण्यांचे निवेदन जिल्हाधिकाऱ्यांमार्फत मुख्यमंत्र्यांना पाठवले आहे. आज दुपारी 12.30 वाजता कलाल-कलार समाजाच्या लोकांनी जिल्हाधिकारी कार्यालयात येवून मागण्यांचे निवेदन निवासी उपजिल्हाधिकारी यांना दिले. या समाजाची प्रगती साधण्यासाठी शासन व शासकीय क्षेत्रात या समाजाचा एकही प्रतिनिधी नसल्यामुळे या समाजाचा विकास होऊ शकलेला नाही, असेही निवेदनात सांगण्यात आले. त्यामुळे या समाजाचे दु:ख आणि समस्या सरकारपर्यंत पोहोचत नाहीत. कलाल-कलार समाजाचा सामाजिक विकास करून त्यांना मुख्य प्रवाहात आणण्यासाठी आर्थिक विकास द्यावा, अशी मागणी करण्यात आली आहे. समाजाच्या वतीने निवेदनात अनेक मागण्या मांडण्यात आल्या आहेत. यामध्ये भगवान सहस्त्रबाहू अर्जुन यांच्या नावाने आर्थिक समुह स्थापन करण्यात यावा, सरदार सर्वेय पापण्णा गौड यांचे स्मारक उभारण्यात यावे, संत सावजी महाराज यांची जयंती शासकीय कार्यालयात साजरी करण्यात यावी, या समाजातील विद्यार्थ्यांना खासगी महाविद्यालयातील शैक्षणिक शुल्कात सवलत देण्यात यावी, यासह अन्य अनेक मागण्या करण्यात आल्या आहेत. शिष्टमंडळात विदर्भ उपाध्यक्ष राजेंद्र शेंडे, संघटक संतोष मानकर, जिल्हाध्यक्ष डॉ. गणेश नाईक, नितीन मेश्राम, गणेश कोसरकर, नितीन उके, सुरेश पटले, सचिन कावरे, शामराव कावरे, सतीश कावरे, अजित कोसरकर, राजू मानकर, दिनेश सागरे आदी उपस्थित होते.
