अजीत दादांना साखरखेर्ड्यात सर्वपक्षीय श्रद्धांजली : बिछडा कुछ इस अदा से के रुत ही बदल गई ये शख्स पुरे राज्य को वीरान कर गया…..!!

अजीत दादांना साखरखेर्ड्यात सर्वपक्षीय श्रद्धांजली :
बिछडा कुछ इस अदा से के रुत ही बदल गई
ये शख्स पुरे राज्य को वीरान कर गया…..!!

🔸असलम अंजुम🔸

साखरखेर्डा : (दि. ३१ जानेवारी)
दि. २८ जानेवारीची सकाळ महाराष्ट्रासाठी अत्यंत वेदनादायी अशी ठरली. आपल्या नियोजितस्थळी पोचण्यासाठी अवघे काही मिनिटे बाकी असतांना अजितदादांचा चार्टर्ड विमान कोसळला आणि क्षणार्धात होत्याचे नव्हते झाले. तब्ब्ल सहा वेळा राज्याचे उपमुख्यमंत्री, प्रशासनावर जबर पकड, एका सच्चा-निडर, शाहू-फुले-आंबेडकरांचा पाईक असलेला एक दबंग नेता अशी ओळख असलेल्या नेत्याला राज्य कायमचा पोरका झाला. अख्खा महाराष्ट्र शोकसागरात बुडाला. ठिकठिकाणी सर्वपक्षीय शोकसभा घेऊन आपल्या लाडक्या नेत्याला आदरांजली वाहण्यात आली तर महाराष्ट्रभरातून लोंढेच्या-लोंढे लाडक्या दादांच्या शेवटच्या दर्शनासाठी बारामतीकडे निघाले.
राष्ट्रवादी काँग्रेस पक्षाचे अल्पसंख्यांक विभागाचे प्रदेश अध्यक्ष एड.नाझेर काजी, आमदार मनोज कायंदे यांनी तर त्यांचे राजकीय छत्रच हरविल्याची खिन्न प्रतिक्रिया व्यक्त करुन आपल्या लाडक्या नेतृत्वाला श्रद्धांजली अर्पण केली तर साखरखेर्डा येथील बसस्थानकावर सर्वपक्षीय नेत्यांनी दिवंगत अजितदादांच्या प्रतिमेला पुष्पमाला अर्पण करुन शोकसंवेदना व्यक्त करत सामूहिक श्रद्धांजली अर्पण केली. या शोकसभेस दोन्ही राष्ट्रवादी काँग्रेस पक्ष, शिवसेना (शिंदे गट), शिवसेना उद्धव बाळासाहेब ठाकरे, भारतीय राष्ट्रीय काँग्रेस, भाजप, वंचित बहुजन आघाडी आदी पक्षांचे पदाधिकारी व कार्यकर्ते प्रामुख्याने उपस्थित होते.